SLS • Sotziedade pro sa Limba Sarda | BW • Biblioteca WolfPrima pàgina > BIBLIOTECA WOLF > Biblioteca Heinz Jürgen Wolf, de Istùdios Linguìsticos e de limba (...)
Biblioteca Heinz Jürgen Wolf, de Istùdios Linguìsticos e de limba sarda
sàbadu 20 martzu 2021, de
Gràtzias a sa voluntade de sa fìgia Mimi e de sa mugere de Wolf, sa biada de Sìlvia, Diegu Corràine at otentu in donu totu sa biblioteca de su prof. Heinz J. Wolf., pro la pònnere a disponimentu de su pùblicu de sos interessados.
Cun custu fundu libràriu e documentale de gabbale, in calidade e nùmeru, Diegu Corràine at fundadu e istituidu sa Bibloteca Heinz Jügen Wolf de istùdios linguisticos e de limba sarda, irrichida e integrada, a bellu a bellu, finas cun àteros libros, istùdios o iscritos linguìsticos o in limba sarda, donados o postos a disponimentu temporàneu o permanente dae privados o dae Entes. Sa BW si riservat de atzetare o nono sas òperas propostas in donu. Donatziones/donadores ant a resurtare in unu catàlogu apòsitu, in custas pàginas.
Sos libros chi formaiant sa biblioteca sua in Bonn nche sunt istados tramudados a Nùgoro, in prus de 50 càssias de cartone, su 14 de freàrgiu de su 2020, a contu de Diegu Corràine matessi, presidente de sa SLS e de sa BW.
Sa Biblioteca Wolf est agasagiada, cun s’agiudu de sa SLS e gràtzias a sa Presidèntzia de s’ANMIG de Nùgoro, in sa "Domo de su Mutiladu", pranu primu a dx, in carrera de Dante Alighieri, 19, cara a cara cun su Litzeu Clàssicu "G. Asproni", in Nùgoro.
Sos libros de sa Biblioteca Wolf podent èssere lèghidos petzi in sa sede e non podent èssere dados in prèstidu. Francu si si tratat de libros galu in cumèrtziu e si sunt presentes in prus de una còpia in sa BW.
