Binchidores de su Cuncursu de prosa in sardu "Màuru Deledda" 2023

Su Comitadu organizadore de su CUNCURSU DE PROSA IN SARDU "MÀURU DELEDDA" (Fundadore in su 1979 de su Prèmiu Casteddu de sa Fae), formadu dae sa FAMÌLIA DE MÀURU DELEDDA, dae AMIGOS DE MÀURU DELEDDA, dae sa SOTZIEDADE PRO SA LIMBA SARDA, dae PAPIROS EDITZIONES,
pùblicat
in die de oe, 18 de abrile de su 2023, su resurtadu de su Cuncursu pro s’editzione 2023 (Setzione ùnica: ROMANZU in Limba Sarda), cunforma a su pàrrere de sa Giuria formada dae:
— Duìliu Caocci, Professore de literadura sarda in s’Universidade de Casteddu (Casteddu)
— Elene Casu, Professora de matèrias literàrias (Tàtari)
— Diegu Corràine, istudiosu de limba sarda (Nùgoro)
— Crara Farina, atora, iscritora (Tàtari)
— Giuanne Luisu Stochino, Professore de matèrias literàrias (Casteddu)
Binchidores, in paridade, de s’Editzione 2023:
—BADDE TÈRRINA de Italo Deledda
—BRATZOS PRO CARVONE de Franca Pirisi
•
Cunforma a su Bandu, su prèmiu pro s’autore de s’òpera chi binchet est:
—s’editzione de s’òpera premiada in unu libru publicadu a contu de su Comitadu organizadore "Cuncursu Màuru Deledda", dae sa sotziedade editoriale Papiros, chi est titulare de sos deretos literàrios pro tres annos dae sa data de publicatzione;
—30 còpias de su libru imprentadu;
—su diploma de su Cuncursu de Prosa in Sardu "MÀURU DELEDDA" .
In s’ed. 2023, sas òperas premiadas chi ant a èssere publicadas sunt duas, duncas
Sigomente, cunforma a sas règulas istabilidas, s’òpera devet èssere iscrita sighende sas normas linguìsticas de referèntzia de sa RAS (Delìbera Giunta Regionale n. 16/14 de su 18-4-2006 "Limba Sarda Comuna"), su comitadu organizadore e sa SLS / Sotziedade pro sa Limba Sarda ant a sistematizare sas òperas binchidoras (chi non sunt iscritas in manera normativa), de acordu cun s’autore, su testu e sa grafia de sas òperas premiadas aplichende sas normas in pessu numenadas.
—Sas òperas premiadas ant a èssere publicadas petzi in limba sarda.
—Sas òperas e sos libros premiados ant a èssere presentados, a pustis de custa òpera de revisione e de s’imprenta in forma de libru, in Nùgoro e in Tàtari, in ue istant sos autores.
Sa data de sas presentadas at a èssere comunicada a sos autores e a su pùblicu in antis chi s’at a pòdere.

Nùgoro, 18 de abrile de su 2023
Diegu Corràine
Presidente de sa SLS e de sa Giuria

Sos autores
ITALO DELEDDA

Nàschidu in Pasada, at cumpridu sos istùdios in s’Universidade de Casteddu, cun una tesi de literadura ispagnola. Est istadu professore de italianu e istòria in s’Istitutu Magistrale de Nùgoro.
At publicadu istùdios de istòria, e, a ùrtimu, su romanzu L’Isola degli Inizi, in su 2018.

FRANCA PIRISI

Naschida in Turalva, at frecuentadu su Litzeu Clàssicu in Tàtari e sa facultade de Filosofia in Casteddu. At insinnadu italianu e istòria in sos Istitutos tècnicos e professionales, filosofia e istòria in sos Litzeos. At collaboradu cun giornales e rivistas. In su 2019 at publicadu su romanzu "Cara mamma, ho freddo", ambientadu durante su fascismu e sa segunda gherra mundiale; in su 2022, "Omne quod Sardinia fert" regorta de contos in limba italiana e in limba sarda.