Heinz Jürgen Wolf, istudiosu de limba sarda

Heinz Jürgen Wolf (Düsseldorf, Germània 1936 - Bonn 2016), est istadu unu linguista tedescu.

At istudiadu romanìstica, anglìstica e filosofia in sas universidades de Colònia e de Aix-en-Provence, laureende·si in frantzesu e inglesu in su 1962. A pustis at cungruidu unu dotoradu de chirca in s’universidade de Colònia cun unu traballu subra de sos nùmenes ètnicos frantzesos, Die bildung der französischen Ethnica (1967). Cunsighida sa dotzèntzia lìbera in su 1970, est ordinàriu de Linguìstica romanza in s’universidade de Bonn dae su 1974.

At iscritu paritzos traballos subra de sas limbas romànicas, mescamente s’italianu e su frantzesu e, dae su 1983, finas su sardu; in particulare s’est interessadu de fonètica istòrica, formatzione de sas paràulas, dialetològia e toponomàstica. In mesu de sas publicatziones suas tocat de ammentare Glosas Emilianenses (1991), una monografia subra de su navarru-aragonesu antigu, e Französische Sprachgeschichte (1979), un’istòria de sa limba frantzesa. In particulare, subra de su sardu at publicadu Studi barbaricini (1992), una regorta de istùdios, e Toponomàstica barbaricina (1998), subra de sa toponomàstica de noe biddas de sa Barbàgia.

Die Bildung der französischen Ethnica, Genève/Paris, 1967.

Französische Sprachgeschichte, Heidelberg, 1979.

Glosas Emilianenses, Hamburg, 1991.

Studi barbaricini, Casteddu, 1992.

Toponomàstica barbaricina, Nùgoro, 1998.

(dae sc.wikipedia.org)